Poems from Kunwar Narayan

Bachche ki khushi

Ek saaf-suthare chaukaur kagaz ki tarah
utthakar zindagi ko pyar se
sochta hoon is par kuch likhun
Phir
use koi mor dekar
kai tahon mein baantkar
ek naav banata hoon
aur behtay paani par chupchaap chorkar
us sey alag ho jaata hoon
bahaav main wah
kagaz nahin
ek bachche ki khushi hai.

Ek Ajeeb Din

Aaj saare din bahar ghoomta raha
aur koi durghatana nahin huyi
aaj saare din logon se milta raha
aur kahin apmaanit nahin hua
aaj saare din sach bolta raha
aur kisi ne bura nahin maana
aaj sabka yakeen kiya aur kahin dhokha nahin khaaya
aur sabse bada chamatkar to yeh
ki ghar lautkar maine kisi aur ko nahin
apne ko hi lauta hua paaya.

Laapata ka huliya


Rang gehuwaan dhang khetihar
uske maathe par chot ka nishaan
kad paanch foot se kam nahin
aisi baat karta ki use koi gham nahin
tutlata hai
umr poocho to hazaaron saal se kuch
zyada batlaata hai
dekhne main paagal sa lagta hai
kai baar oonchaiyon se girkar
toot chuka hai
isiliye dekhne par juda hua lagega
Hindustan ke nakshe ki tarah.

~ ~ ~